Забур ба забони Шугнӣ | Zabur ba zaboni Shughni

Забӯр китобанден 150 – соз, девен а̄м ҷамомадандат, а̄мен ху дуойанд Хуδойард истифода̄ чӯд. Йу̊данден аррақама̄ҷаϑ созен: ситоԝах̇ат, фалакийат, шукратат, тӯба̄ созенат, пи Хуδой таԝакал чӣдоw созенат, ибодатху̊на̄ зийорат чӣдоw созен; маддоху̊ни, потх̇о ба тахтних̇ӣнийанден ԝев ца лу̊д, та̄лӣмийат хирад созенга.

Забӯрен лап баунараϑ нивишч, амо пи дам ма̄ни фирӣптоԝ ҷа̄т ма̄ш бойад дар борайи дам таркӣб қайд кина̄м. Забӯр созенен пӣнӡ қисмард тақсӣм сиц: (1 – 40; 41 – 71; 72-88; 89 – 105; 106 -150), мӯмкин пӣнӡ китоби Мӯсо Таԝрот ҷиноԝен ԝам нивишч. 1 – ум соз, анҷа йид таму̊ми китоб сарсухан, 150 – ум соз, йид а̄м 5 – ум қисм китобат, а̄м таму̊ми Забӯр китоб ҷамбаст ких̇т. Дев китобенанден қисмен йаст иде̂, ԝа̄δен пиро алойида̄йаϑ китоб виц. Мисол, да̄δен пи биланди сифӣдоԝ созен (119 – 133), йо Ософ созен (72 – 82). Забӯр созенанден лап чуқур иссийотен байу̊н сиц. Йу̊данден хушийат, ситоԝах̇ат, боԝари созенаϑ Хуδойард нистат, дар борайи қа̄рат, х̇емӯнсидат, х̇оҷ аз ху дух̇манен созенен мис йаст. Фана̄ Забӯр созен дар борайи Исойи Масе зойирсид пех̇гӯйийен. Мисол 2 – йумат, 109 – ум созанд дар борайи Исо, амчун замӣн Оким аз Хуδой хез лу̊вҷинат, 21 – ум соз дар борайи Ԝи азобен одамӣнзод гунойен ҷа̄т, пех̇гӯйи ких̇т.